काठमाडौं। ब्याज आम्दानीमा उल्लेख्य गिरावट आए पनि दूरसञ्चार सेवाबाट हुने आम्दानीमा सुधार भएपछि नेपाल टेलिकमले गत आर्थिक वर्ष २०८२/८३ मा खुद मुनाफा ४७.५८ प्रतिशतले बढाएको छ। कम्पनीले आर्थिक वर्षको चौथो त्रैमासिकसम्म ८ अर्ब ८६ करोड ४६ लाख रुपैयाँ खुद मुनाफा आर्जन गरेको हो।
नेपाल टेलिकमको अपरिष्कृत वित्तीय विवरणअनुसार अघिल्लो आर्थिक वर्ष २०८१/८२ को सोही अवधिमा कम्पनीको खुद मुनाफा ६ अर्ब ६७ लाख रुपैयाँ थियो। एक वर्षमा कम्पनीको खुद मुनाफा २ अर्ब ८५ करोड ७९ लाख रुपैयाँले बढेको छ।
नाफामा आएको यो वृद्धिको प्रमुख पक्ष सञ्चालन व्यवसायको सुधार देखिएको छ। कम्पनीको कुल सञ्चालन आय ३४ अर्ब ९५ करोड ४ लाख रुपैयाँ पुगेको छ। अघिल्लो आर्थिक वर्षमा यस्तो आय ३३ अर्ब ८९ करोड ४५ लाख रुपैयाँ थियो। यसअनुसार सञ्चालन आय १ अर्ब ५ करोड ५९ लाख रुपैयाँ अर्थात् ३.१२ प्रतिशतले बढेको हो।
कम्पनीको कुल आयसमेत ३९ अर्ब १९ करोड ९६ लाख रुपैयाँ पुगेको छ। अघिल्लो वर्ष ३८ अर्ब १८ करोड ८१ लाख रुपैयाँ रहेको कुल आय यस वर्ष १ अर्ब १ करोड १५ लाख रुपैयाँ अर्थात् २.६५ प्रतिशतले बढेको हो।
ब्याज आम्दानी घट्यो, तर मुख्य व्यवसाय बलियो
नेपाल टेलिकमको वित्तीय विवरणमा देखिएको अर्को महत्वपूर्ण पक्ष भनेको ब्याज आम्दानी घट्दासमेत नाफामा भएको वृद्धि हो। घट्दो ब्याजदरका कारण कम्पनीको ब्याज आम्दानी अघिल्लो वर्षको तुलनामा ८६ करोड १९ लाख रुपैयाँ अर्थात् २२.८८ प्रतिशतले घटेको छ।
तर, ब्याज आम्दानीमा आएको गिरावटलाई दूरसञ्चार सेवाबाट हुने आम्दानीको वृद्धिले पूर्ति गरेको छ। विशेषगरी जीएसएम सेवाबाट हुने राजस्व ६४ करोड ५४ लाख रुपैयाँ अर्थात् २.२८ प्रतिशतले बढेको कम्पनीले जनाएको छ।
यसले कम्पनीको आम्दानी संरचनामा वित्तीय लगानीबाट प्राप्त हुने ब्याजभन्दा मुख्य दूरसञ्चार व्यवसायको योगदान बढ्दै गएको संकेत गरेको छ।
ईबीआईटीडीएमा दोहोरो अंकको वृद्धि
कम्पनीको सञ्चालन क्षमतामा सुधार भएको अर्को सूचक ईबीआईटीडीए हो। चौथो त्रैमासिकसम्म नेपाल टेलिकमको ब्याज, कर, ह्रासकट्टी तथा परिशोधनअघिको मुनाफा (ईबीआईटीडीए) २० अर्ब ४८ करोड १ लाख रुपैयाँ पुगेको छ।
अघिल्लो आर्थिक वर्षमा यस्तो मुनाफा १८ अर्ब ४९ करोड ६० लाख रुपैयाँ थियो। यस वर्ष ईबीआईटीडीए १ अर्ब ९८ करोड ४१ लाख रुपैयाँ अर्थात् १०.७३ प्रतिशतले बढेको छ।
त्यस्तै, करअघिको मुनाफा १३ अर्ब २६ करोड ४७ लाख रुपैयाँ पुगेको छ। अघिल्लो वर्ष ९ अर्ब ८५ करोड २ लाख रुपैयाँ रहेको करअघिको मुनाफा यस वर्ष ३ अर्ब ४१ करोड ४५ लाख रुपैयाँ अर्थात् ३४.६६ प्रतिशतले बढेको हो।
करअघिको मुनाफामा आएको ३४.६६ प्रतिशतको वृद्धि र खुद मुनाफामा भएको ४७.५८ प्रतिशतको वृद्धिले कम्पनीको समग्र वित्तीय परिणाममा उल्लेख्य सुधार भएको देखाउँछ।
प्रतिफल क्षमतामा सुधार
नेपाल टेलिकमको वार्षिकीकरण आधारमा प्रतिसेयर आम्दानी (ईपीएस) ४९ रुपैयाँ २५ पैसा पुगेको छ। नाफा वृद्धिसँगै प्रतिसेयर आम्दानीमा आएको सुधारले कम्पनीको सेयरधनी प्रतिफल क्षमतासमेत बलियो भएको देखाउँछ।
यद्यपि, कम्पनीले विकट तथा दुर्गम क्षेत्रमा समेत दूरसञ्चार सेवा विस्तार र गुणस्तर सुधारमा निरन्तर लगानी गर्नुपर्ने अवस्था रहेको जनाएको छ। कम प्रतिफल प्राप्त हुने क्षेत्रमासमेत सेवा विस्तार गर्नुपर्ने दायित्वका बीच मुख्य व्यवसायबाट आम्दानी बढाउँदै नाफा सुधार गर्नुलाई कम्पनीको वित्तीय प्रदर्शनको सकारात्मक पक्षका रूपमा लिन सकिन्छ।
